1449137590b9g36_630x350

Цементийн экспорт “гацжээ”

Барилга, хот байгуулалтын сайд Х.Баделхан “МАК цемент”, “Монцемент билдинг материалс”, “Хөтөл цемент-шохой” компанийн удирдлагатай өчигдөр уулзжээ. Энэ үеэр Засгийн газрын 2016-2020 оны үйл ажиллагааны төлөвлөгөөнд тусгасан Монголд үйлдвэрлэсэн цементийг экспортлох бизнесийн таатай орчин бүрдүүлэх ажлын үр дүнг ярилцаж, санал бодлыг нь сонссон байна.

“Хөтөлийн цемент-шохой” компани 2009-2015 онд 10 000 тонн цемент, 20 000 тонн клинкер экпортолсон аж. Тэд “ОХУ-д цемент экпортлох гаалийн бүрдүүлэлт хийхэд 19 төрлийн бичиг баримт шаарддаг. Мөн тэднийх гадаадаас импортлодог материалд тохирлын гэрчилгээ олгодог журамтай. Гэрчилгээ нэг жил хүчинтэй байдаг. Тиймээс цемент экспортлох урт хугацааны бизнесийн орчин бүрдэхгүй байна. Гэрчилгээ авах аудиторын шалгалтыг долоон сар хийдэг. Ингээд гурван сарын хугацаа үлддэг” гэжээ.

Тэгвэл “МАК цемент” компанийнхан “Хойд хөршид цемент экспортлохоор сүүлийн жил гаруй хугацаанд ажиллалаа. Хамтран ажиллах гэрээ компаниудтай байгуулсан ч тодорхой үр дүнд хүрээгүй. ОХУ маш олон төрлийн бичиг баримт шаарддаг. Материалын тохирлын гэрчилгээ нь өндөр үнэтэй. Гэрчилгээг цементийн төрөл бүрт авах шаардлага үүсдэг. Жилийн хугацаанд хоёр сая ам.доллар төлөхөөр байгаа.

Иймд гэрчилгээний хугацааг зөвхөн манай цемент нийлүүлэх бүсэд сунгах санал оруулмаар байна” гэсэн аж. “Монцемент билдинг материалс” ХХК-ийнхан “Худалдан авагч, хэрэглэгч нь байгаа ч бусад үйлдвэртэй адил экспортлох нөхцөл бүрдэхгүй байна” хэмээжээ. Дотоодын үйлдвэрүүд жилд дөрвөн сая тонн цемент үйлдвэрлэх хүчин чадалтай болсон. Барилгын салбар өсөлттэй үед дотоодын хэрэгцээ 2.5 сая тоннд хүрэх гэнэ.

Тэгэхээр 1.5-2 сая тонн цемент экспортлох бүрэн боломжтой аж. Ийм хэмжээний цемент экспортлоход 175-200 сая ам.долларын орлого орлох тооцоог үйлдвэрлэгчид гаргажээ. БХБЯ-наас дээрх бэрхшээлийг хамтран шийдвэрлэх хүрээнд Гадаад харилцааны яаманд санал хүргүүлэхээр болж уулзалт өндөрлөсөн байна.

Ачаалж байна
Зочны үнэлгээ
0 (0 votes)

Сэтгэгдэл бичих