Засгийн газраас Ашигт малтмалын тухай хуульд нэмэлт өөрчлөлт оруулах хуулийн төслийг УИХ-д өргөн бариад жил шахуу болж байгаа. Хуулийн төслийг намрын чуулганаар өргөн бариад хэлэлцэх байсан ч намрын чуулган ирц бүрдэхгүйн улмаас хуралдаж чадаагүй билээ.
Тиймээс ээлжит бус чуулганы хуралдаанаар Ашигт малтмалын тухай хуульд нэмэлт өөрчлөлт оруулах хуулийн төслийг хэлэлцэхээр болсон билээ.
Хуулийн төсөлд алтны татварыг 2023 он хүртэл 2.5 хувь болгох санал туссан юм. Тус хуулийн төслийг баталж чадахгүй байгаатай холбоотойгоор Монголбанкинд тушаадаг алтны хэмжээ эрс буурчээ. Тодруулбал, өнгөрсөн оны мөн үеийнхтэй харьцуулвалалтны тушаалт 81 хувиар буурсан байна.
2014 онд алтны нөөц ашигласны татварыг 2.5 хувь байхаар хуульчилсан бөгөөд энэ хугацаа 2019 оноор дуусгавар болж байгаа юм. Тиймээс 2023 он хүртэл сунгах саналыг хуулийн төсөлд тусгаад байгаа. Ингээд тус хуулийн төсөл дээр ажлын хэсэг гаргасан бөгөөд УИХ-ын гишүүн Б.Баттөмөр ахалж байгаа аж.
